Fin de curso 2018 / 2019

E aí vai a outro final de curso... Como pasa o tempo! Parece que foi onte cando chegaba ao Julio Prieto Nespereira e xa teño que marchar de novo. 

A verdade é que este ano foi especial para min porque foi unha experiencia marabillosa poder impartir aulas no meu insti, no centro no que eu estudei o Bacharelato e o COU (que tempos!!). Ver de novo a profes dos que fun alumna e agora telos de compañeiros ... ter por alumnos e alumnas á rapazada do meu barrio... o certo é que unha experiencia preciosa. 

Cando eu era alumna, nunca pensei que chegaría a dar clases no meu propio instituto, pero a vida dá moitas voltas. Espero e desexo que algúns dos nenos/as que tiven este curso teñan a mesma oportunidade no futuro e que nos volvamos atopar no Julio Prieto Nespereira, a próxima vez, de colegas de profesión ( e se poder ser como colegas do Departamento de Galego, moito mellor :-)). 

Un abrazo enorme para toda a xente do mellor instituto de Ourense, grazas por todo o cariño e ...

BO VERÁN!!!

Deseño gañador do concurso Letras Galegas

Autora: Noelia Nogueiras - 1º BAC - A

Letras Galegas 2019: Antón Fraguas

Achégase o 17 de maio, data na que celebramos o Día das Letras Galegas, este ano dedicado á figura de Antón Fraguas. Atoparedes información e recursos sobre el no Portal da Lingua Galega.

Tamén deixamos as bases para o concurso de adhesivos que organizan o EDLG e o Departamento de Galego do IES Julio Prieto Nespereira.

Coplas dos Maios 2019

Un ano máis, aquí deixamos o enlace ao traballo que fixeron os rapaces do noso insti. Nesta ocasión son as coplas que fixeron os rapaces e rapazas de 1º ESO do IES Julio Prieto Nespereira, de Ourense. Esperemos que vos gusten!

Coplas dos Maios 2019

Festa dos Maios 2019

En épocas remotas, os galegos celebraban a chegada da primavera e o remate do cru inverno e propiciaban deste xeito a obtención de boas colleitas. Nos tempos actuais, as festas dos maios son a última manifestación folclórica que festexa en Galicia o final do inverno. Constrúense figuras con elementos naturais, como musgo, flores silvestres, ovos, paus e arredor delas cántanse, con acompañamento de paus, coplas e cancións irónicas e críticas con feitos ou personaxes de actualidade.

O próximo día 5 de maio, celébrase na nosa cidade a tradicional Festa dos Maios, declarada no Consello da Xunta de Galicia do 4 de outubro de 2001 Festa de Galicia de Interese Turístico na provincia de Ourense. Co galllo desta celebación, dende o Concello de Ourense, convócase todos os anos un Concurso de Maios e Coplas no que participan todo tipo de grupos e colectivos sociais e culturais. (www.turismo.gal)

Día da poesía

O 21 de marzo celébrase o Día da Poesía. O alumnado de 1º ESO xa está preparando os seus traballos para participar desta festa da palabra. Aquí deixamos unha pequena mostra.

Tempo de Entroido

Actividade para identificar as máscaras do Entroido da provincia de Ourense.

24 de febreiro: Día de Rosalía

Un ano máis facemos a nosa particular homenaxe a Rosalía de Castro coa creación destes fotopoemas. Desta vez, foi o alumnado de TIC do IES Julio Prieto Nespereira coa axuda da profesora Mª Asunción Rivera.

E desta vez, a banda sonora para o Día de Rosalía póñena as De Vacas co seu tema "Rexurdimente" (que seguro que che soa).

21 de febreiro: Día da Lingua Materna

A ONU proclamou o 2019 como o Ano Internacional das Linguas Indíxenas para que os Estados adopten medidas para preservalas, revitalizalas e promovelas. Alistair Heather explícanos neste vídeo que unha das linguas que se fala en Escocia é o escocés (non só o inglés). Tamén nos conta que, precisamente, esta lingua minoritaria debería de contar cunha maior protección. Se nos paramos a pensar, o certo é que escocés e galego parecen ter trazos en común no que respecta á súa situación e historia... 

Ademais, nos próximos días celebrarase o Día Internacional da Lingua Materna, que foi proclamado pola Conferencia Xeral da UNESCO en novembro de 1999 e que se celebra anualmente dende o 21 de febreiro de 2000 cos obxectivos de promover o plurilingüismo e a diversidade cultural. 

Fonte: DornaFG

Poesía namorada

O 14 de febreiro serviulle ao alumnado de inspiración para crear algunhas composicións poéticas. Algúns ata se atreveron cos sonetos! 

O seseo estase perdendo

"O seseo estase perdendo" é o titular que nos chega dende o xornal La Voz de Galicia. Nel, Tamara Ríal Fontes fala sobre esta característica fonética do noso idioma. Por se o queredes ler, deixamos a ligazón aquí.

Fonte: www.edu.xunta.es 

De amor e amizade

Se en xaneiro tivemos o Día da Paz, este mes de febreiro non podemos esquecer unha data tan sinalada como é o Día dos Namorados ou o San Valentín (que tanto nos/vos gusta). Para celebralo, convidámosvos a crear unha pequena composición literaria en formato de carta, conto ou poema que faga referencia ao amor ou á amizade. Por se vos serve de inspiracións, compartimos esta antoloxía de poemas de amor que fixo a compañeira Celia Díaz.

VINTE POEMAS DE AMOR - Antoloxía De Poesía Galega

Publish at Calameo

Fonte: moléculasengalego

 

III Concurso Literario Infantil sobre a protección de datos

A Consellería de Educación, Universidade e Formación Profesional e o Colexio Profesional de Enxeñaría en Informática de Galicia (CPEIG) convocan o “III Concurso literario infantil e xuvenil sobre a protección de datos”. Poderá participar o alumnado de 1º a 4º de ESO (tamén 5º e 6º de Primaria). Deixamos toda a información aquí.

Fonte: www.edu.xunta.gal

Bo Nadal!

E chegamos ao final do ano e do primeiro trimestre! O último día, puidemos desfrutar das actuacións do alumnado do centro, ademais de entregar os premios aos gañadores/as dos concursos de nacementos e de postais de Nadal. Parabéns e boas festas!

 1º Premio: Hugo 

 2º Premio: Lucía

3º Premio: Estela

Postais de Nadal

Chega o Nadal

Para este mes de decembro, estamos a preparar un concurso de postais de Nadal coa axuda do Departamento de Educación Plástica e Visual e do Departamento de Relixión. Poderá participar todo o alumnado do IES Julio Prieto Nespereira e a tarxeta que resulte gañadora será a imaxe oficial do Instituto para confeccionar a felicitación destas festas.

E para os máis pequenos, a Mesa pola Normalización Lingüística achéganos material para coñecer mellor a figura do Apalpador. Aquí deixamos uns enlaces nos que poderedes descargar a unidade didáctica e o formato de carta para enviarlla ao Apalpador. 

Como chegou a vacina da varíola a América?

No portal da Consellería de Educación, preséntase unha unidade didáctica cunha guía que propón unha serie de recursos innovadores aplicables para os cursos de 3º e 4º de ESO nas materias de Bioloxía e Xeoloxía e Xeografía e Historia. O fío condutor é a chegada da vacina da varíola a América. Aquí deixamos as ligazóns: 

-Unidade didáctica.

-Curso (entrar como convidado).

Os nenos da varíola (María Solar)

25 de novembro

O 25 de novembro celébrase o Día Internacional contra a Violencia de Xénero. Para tratalo na aula, podemos axudarnos da seguinte presentación (EDLG do IES Enrique Muruais) que nos fala das orixes deste día e da historia das irmás Mirabal.

No IES Julio Prieto Nespereira, o alumnado e o profesorado quixeron mostrar o seu compromiso coa loita contra a violencia de xénero. Poesías, haikus, bolboretas e debuxos tamén serven para denunciar a violencia contra a muller.

Relatos de medo

Xa temos as gañadoras do concurso Relatos de medo! O primeiro premio foi para Antía, alumna de 1º ESO A co seu relato titulado "Impo", mentres que o segundo premio foi para a historia "1938". Outra alumna de 1º ESO A, Estela, obtivo o terceiro premio co conto "Coidado coa túa curiosidade".

Novembro: mes do medo

Este mes de novembro celebramos o Samaín, pero tamén os Magostos, especialmente na nosa terra ourensá. Por ese motivo, na entrada do centro hai unha pequena exposición sobre as orixes destas datas tan sinaladas. Ademais, o alumnado está moi atarefado xa que está a decorar as cabazas de Samaín e a transformar as aulas en espazos que dan auténtico medo... Tamén están preparadas as historias de medo coas que poderán participar no Certame de relatos de medo. O próximo venres, 16 de novembro, saberemos quen son os gañadores ou gañadoras!

Explícoche Matemáticas 2.0

Este é o ví­deo gañador do concurso Explícoche Matemáticas 2.0 da USC na categorí­a de 2º ciclo da ESO, Bacharelato e Formación Profesional.  O premio foi para o ví­deo Como calcular o tamaño da Terra, de Aarón Vilariñoo Folgueiras, alumno de 4º da ESO do IES Lamas de Abade.

Guía dos elementos químicos

O grupo de innovación docente CienciaNOSA da Universidade de Santiago de Compostela (USC) publicou a nova versión en galego da Táboa periódica dos elementos, que recolle os novos elementos incorporados pola Internacional Union of Pure and Applied Chemistry (IUPAC).

Deixamos o enlace a esta nova publicación aquí. 

Para máis información, podes consultar a páxina do xornal da USC.